De iëerste liedjesaovend woort gehaje op donderdig 26 november 1953. Vur dees ieërst editie woorte elf vastelaovessjlaegers ingesjteurd. Op dae aovend woort d’r gesjiedenis gesjréve in ’t Belhamelriek. Sjeng Schell won de ieërste pries mèt ziene sjlaeger “Sjeng doot dów de kinger maar nao bed” op de meziek van Theo Langendonk. Daonao woort d’r idder jaor in oktober de liedjes aovend later liedjes matinee georganiseerd. Vanaaf 1977 kwame de winnende sjlaegers op vinyl oet. Laternao rónk 1986 / 1987 ware ze ouch op cassette te kriege. Sins ’t jubileumjaor 1997 ( 4x11 jaor) versjene de winnende sjlaegers op cd. C.V de Belhamels zörgde zelf vur de opnames en produktie via Jan Theelen in Munstergeleen. Heejdoor kreeg de vereiniging ouch de gebroeksrechte van de geluidsdragers. ‘t Ieërste winnende vastelaovesliedje dat op de geluidsdragers versjeen waas ”t Viltje”van de Kuumers (opgerich in 1978). De opbrings van de verkochte plaetjes, casettes,cd woort gebroek vur angere aktiviteite. In 1992 behaolde ’t Belvendse liedje “Goojemorge, Goojedaag” ( gesjreve daor Jac Linssen en gezónge door Jacques Geurts en Marie-Louise op ’t Veld) de veerde plek op ’t Limburg Leedjes Konkoers (LVK) ein sjieke prestatie vur ’n dörp van ós formaat.
